Pryd fydd y Llywodraeth yn cyhoeddi adroddiad yr Athro Kevin Morgan a oedd yn ystyried strwythurau tymor hir posib ar gyfer adfywio economaidd yn seiliedig ar le ac iaith yn rhanbarthau Arfor a’r Cymoedd?
Bydd adroddiad yr Athro Kevin Morgan yn cael ei rannu gyda chi cyn bo hir.
Mae'r cyllid o £11m y cytunwyd arno yn llawn wedi bod ar gael gan y Llywodraeth hon i'r rhaglen ARFOR a ymrwymwyd tan ddiwedd mis Mawrth 2025. Mae cyllid ychwanegol o £500k ar gael i'r 4 awdurdod lleol ar gyfer ARFOR ar gyfer y flwyddyn ariannol gyfredol i ganiatáu pontio. Mae'r cam hwn o ARFOR yn gyfle i 'oedi a myfyrio' ar y rhaglen.
Bydd y gyllideb a ddyrannwyd yn darparu cyllid ar gyfer rôl barhaus cydlynydd y rhaglen i gynnal arbenigedd a momentwm, dadansoddi ac adolygu tystiolaeth gwerthuso ARFOR 2 ymhellach i ganfod y gwersi allweddol a ddysgwyd. Bydd hyn yn helpu i lywio cyfeiriad y dyfodol, gan gynnwys arfer gorau a gwneud y mwyaf o gyfleoedd i brif ffrydio'r gwersi a ddysgwyd ac egwyddorion ARFOR yn unol â chanfyddiadau ac argymhellion y Comisiwn ar gyfer Cymunedau Cymraeg, rhaglenni presennol a gyflwynir gan Lywodraeth Cymru, awdurdodau lleol a Chyd-bwyllgorau Corfforedig.
Ein nod yw parhau i gydweithio o fewn Llywodraeth Cymru yn ogystal â gyda rhanddeiliaid allweddol a pherthnasol i wella a datblygu polisïau sy'n cefnogi cymunedau Cymraeg ac yn helpu i gynnal y Gymraeg fel iaith gymunedol ffyniannus.
Byddwn yn ystyried canlyniadau'r gwerthusiad annibynnol o'r rhaglen ARFOR 2 a gynhaliwyd gan Wavehill Consulting fel rhan o'r gwaith parhaus a byddwn yn ei rannu gyda chi cyn gynted â phosibl.
Mae'r gefnogaeth ariannol ar gyfer ARFOR ar gyfer y flwyddyn ariannol hon yn cynnwys cyllid parhaus ar gyfer cydlynydd y rhaglen a gyflogir gan lywodraeth leol i gadw gwybodaeth ac arbenigedd. Darparwyd y cyllid ar gyfer ARFOR 2 yn uniongyrchol i'r awdurdodau lleol a oedd yn rheoli ac yn cyflawni'r gwahanol ymyriadau o dan y rhaglen hon - naill ai'n uniongyrchol neu'n anuniongyrchol trwy gontractau a gomisiynwyd gan bartneriaid cyflenwi am gyfnod o amser y cytunwyd arno. Roedd y contractau hyn rhwng yr awdurdod lleol a'r contractwyr yn uniongyrchol ar gyfer darparu gwasanaethau y cytunwyd arnynt, gan gynnwys Llwyddo'n Lleol ac ati ac felly nid ydym yn cadw gwybodaeth am nifer y staff a gyflogir gan y contractwyr i ddarparu'r gwasanaethau y cytunwyd arnynt.