Beth yw'r newyddion diweddaraf ynghylch prosiect twnel y Rhondda, ac ydy Llywodraeth Cymru yn parhau yn gefnogol i'r prosiect?
Rydym yn gwbl gefnogol i'r prosiect ac yn awyddus i’w weld yn cael ei gyflawni mewn partneriaeth. Rydym wedi bod wrthi'n gweithio gyda rhanddeiliaid allweddol, gan gynnwys Cymdeithas Twnnel y Rhondda a chynghorau Castell-nedd Port Talbot a Rhondda Cynon Taf i ddod o hyd i ffordd gynaliadwy ymlaen ar gyfer y prosiect hwn.
Mae cynnydd mawr wedi’i wneud o ran y trafodaethau gyda'r Adran Drafnidiaeth ar drosglwyddo twnelau Rhondda ac Aber-nant. Gellid cwblhau'r broses gyfreithiol o drosglwyddo perchnogaeth ymhen ychydig wythnosau.
Unwaith y bydd ffigurau pendant ar gyfer costau cyfalaf a refeniw'r prosiect, gellir bod yn hyderus am gyflwyno ceisiadau i gyrff ariannu, megis Cronfa Dreftadaeth y Loteri Genedlaethol.
O gofio bod yr amcangyfrif ar gyfer y costau cyfalaf yn unig mor uchel â £17m ar hyn o bryd, sy'n sylweddol uwch na lefel unrhyw ddyfarniad blaenorol a wnaed gan Gronfa Dreftadaeth y Loteri yng Nghymru, bydd yn heriol dros ben, ond bydd Llywodraeth Cymru yn gwneud popeth o fewn ei gallu i gefnogi ceisiadau.
Ar hyn o bryd, Llywodraeth y DU sy'n atebol am y twnnel, sy’n rhan o'r seilwaith cysylltiedig â hen reilffyrdd y mae wedi’i etifeddu. Rydym am ei gweld yn ei drosglwyddo i bartneriaeth, ond mae'r taliad gwaddoli o £60,000 y mae'n fodlon ei drosglwyddo ar hyn o bryd yn gwbl annigonol. Byddwn yn parhau i weithio gyda hi i gytuno ar drosglwyddo swm sydd nid yn unig yn cydnabod y gost o gadw'r twnnel yn ei gyflwr presennol ond hefyd y costau a fydd yn gysylltiedig â’i ei agor er budd y cymunedau yr ydym yn eu gwasanaethu