Cynulliad Cenedlaethol Cymru

Dileu popeth a rhoi yn ei le:

1. Yn credu bod 27 mlynedd o Lywodraethau Llafur Cymru a gefnogwyd gan Blaid Cymru a'r Democratiaid Rhyddfrydol wedi bod yn fethiant i bobl Cymru.

2. Yn cydnabod mai dim ond Reform UK sydd â chynllun credadwy i roi pobl Cymru yn gyntaf.

Ychwanegu fel pwyntiau newydd ar ddiwedd y cynnig:

Yn gresynu bod Llywodraeth Cymru wedi methu ag ymyrryd ym mhenderfyniad Cyd-bwyllgor Comisiynu GIG Cymru i fabwysiadu argymhellion y Gwasanaeth Casglu a Throsglwyddo Meddygol Brys, a oedd yn cynnwys cau canolfannau ambiwlans awyr yn y Trallwng a Chaernarfon yn barhaol.

Yn credu:

a) y dylai Llywodraeth nesaf Cymru ymyrryd i sicrhau bod canolfannau ambiwlans awyr yn parhau i fod yn weithredol yn y Trallwng a Chaernarfon;

b) y dylai byrddau iechyd Cymru ac ymddiriedolaethau iechyd Lloegr weithio'n agos gyda'i gilydd er budd cleifion, waeth ble maent yn byw;

c) ei bod yn anesgusodol i fyrddau iechyd Cymru ofyn i ddarparwyr iechyd yn Lloegr arafu'n fwriadol y broses o ddarparu triniaeth i gleifion, er bod gan y darparwyr hynny yn Lloegr ddigon o gapasiti;

d) bod y Llywodraeth bresennol wedi methu trigolion Powys drwy beidio ag ariannu Bwrdd Iechyd Addysgu Powys i lefel sy'n ei alluogi i brynu capasiti gofal iechyd yn Lloegr yn unol â thargedau amseroedd aros Lloegr; ac

e) y dylai llywodraeth nesaf Cymru sicrhau na ddylai unrhyw fwrdd iechyd yng Nghymru gael ei ganiatáu i ofyn i ddarparwyr yn Lloegr ohirio triniaeth y GIG ar gyfer cleifion o Gymru.

Dileu popeth a rhoi yn ei le:

1. Yn credu bod 27 mlynedd o Brif Weinidogion Llafur yng Nghymru, yn ogystal â Llywodraethau Ceidwadol a Llafur y DU wedi methu â gwella bywydau pobl Cymru.

2. Yn credu ymhellach na fydd pleidiau nad yw eu ffocws ar Gymru'n unig, ac nad ydynt wedi'u lleoli yng Nghymru, fyth yn blaenoriaethu buddiannau pobl Cymru, ac mai dim ond Plaid Cymru sydd â chynllun cyflawn a chredadwy i sicrhau’r arweinyddiaeth newydd y mae Cymru ei hangen.

Dileu popeth a rhoi yn ei le:

Cynnig bod y Senedd:

1.     Yn cefnogi record Llywodraeth Lafur Cymru o gyflawni dros bobl Cymru, gan gynnwys:

a)    y lleihad mwyaf, a mwyaf parhaus, ar gofnod yn y rhestr aros gyffredinol a'r gostyngiad cyflymaf ar gofnod mewn arosiadau dwy flynedd;

b)    bron i £4 biliwn wedi’i fuddsoddi mewn adeiladau ysgolion a cholegau newydd ym mhob rhan o Gymru;

c)    creu neu ddiogelu mwy na 50,000 o swyddi yn y sector preifat y tymor hwn;

d)    cyflawni gwelliannau o ran ffyrdd, trawsnewid y fflyd rheilffyrdd, a chyfraith newydd sy'n dod â gwasanaethau bysiau yn ôl o dan reolaeth gyhoeddus;

e)    y cyflenwad parhaus uchaf o dai cymdeithasol mewn bron i ddau ddegawd;

f)     Cymru'n parhau i fod yn ail yn y byd o ran ailgylchu, i fyny o bump y cant yn cael ei ailgylchu ar ddechrau datganoli i dros 68 y cant heddiw;

g)    dros £7 biliwn wedi'i fuddsoddi i gadw arian ym mhocedi pobl; a

h)    y buddsoddiad mwyaf mewn gwasanaethau cyhoeddus yn hanes datganoli, drwy'r Gyllideb Derfynol ar gyfer 2026-27.

Cyllideb Derfynol Llywodraeth Cymru 2026 i 2027